ராஜவசம்

நாக்கு

சொற் பந்துக்கு
எப்பக்கத்துக்கும் ஆடக்கூடிய
துடுப்பாட்டக்காரன்

நிலவு

பெண்ணை நிலவுக்கு ஒப்பிடுவர்
ஆராய்வதற்கு சரி-ஆனால்
ஆனந்தமாய் வாழ்வதற்கு?

உடை

உயிர் கொண்ட சட்டைக்கு
ஊர் போடும் சட்டை


கண்

மனம் நினைத்ததை
மறுஒளிபரப்பு செய்வது

திருமணம்

இல்லறத்திற்கு
முகவுரை

மனது

எல்லாவற்றையும் பதிந்து
அதற்கு உகந்த நேரத்தில்
அசைபோடும் நினைவுபெட்டகம்

பெண்

ஆணை ஆள்வதற்கு
ஆண்டவன் கண்ட ஆயுதம்

மலர்

தேனீக்களுக்கு உணவு
தரும் கற்பகதரு

வாழ்க்கை பாடத்தை
கற்பிக்கும்
ஆசான்

குழந்தை

ஆணும் பெண்ணும்
குலவியதற்கு
ஆண்டவன் தந்த பரிசு

ஓமோன்கள் செய்த சேட்டையால்
ஓன்று சேர்ந்தவை செய்த மாயம்

கள்ளம் இல்லா
வெள்ளை உள்ளம்
கனவுகள் இல்லா
நினைவுகள் கொண்ட
கடவுளின் அவதாரம்

மது

மது உண்டவர்க்கு
மறு நாள்
மறு பிறப்பு

இன்று
இளைஞர் கலாச்சாரத்தில்
இன்றியமையாத விடயம்

காதல்

அன்பு பாசம் கருணை
அத்தனையும் கலந்து
ஆண்டவன் தந்த
அமிர்த உணர்வு


இன்று
ஆணுக்கோ அழகின் மேல்
காதல்
பெண்ணுக்கோ பணத்தின் மேல்
காதல்